Kollum fan juster
Shirt
Poeh, dêr hie ik samar in stikje histoarje yn hannen.
Freed wie de earste thúswedstriid fan de Flyers en sa as
alle taskôgers sjen koenen, hie maskotte Frizzly the Eagle net it nije shirt
fan de Unis Flyers oan, mar in collectors item fan de boppeste planke. In shirt
út de romrofte Feenstra Flyers perioade.
In klup moat altyd foarút sjen, mar nea syn histoarje
ferjitte. En de Flyers ha in histoarje dy’t der net om liicht. Yn dat ramt is
it ek in prachtich inisjatyf om fan dy moaie banieren yn de hal op te hingjen
mei ôfbyldings fan alle ikoanen dy’t by de klup spile ha. Dat se by de Flyers
harren toppers van toen net ferjitten binne, die wol bliken doe’t Jack de Heer
en Gordon McDonald mei foarsitter Henk Hoekstra it iis op stapten om de
offisjele face off fan it seizoen 2013/2014 te ferrjochtsjen. In steande ovaasje
foar de beide mannen, prachtich om te sjen. Yn de kommende tiid sille der grif
mear fan dy moaie flaggen yn Thialf ferskine.
De ambysje is dit jier helder, de Flyers wolle kampioen
wurde. Nei al dy jierren wachtsjen soe it foar de no al wer mear as 1000 trouwe
taskôgers in dream dy’t útkomt wêze. Oan de earste wedstriid ôf te lêzen soe dy
ambysje wolris aaklich ticht benadere wurde kinne. It sil my benije, der binne
fansels noch in pear teams dy’t alle jierren oan de ein ta meidogge. Mar in
ambysje útsprekke is neat mis mei.
Yn it skoft tusken de twadde en tredde perioade stie ik
samar mei dat shirt yn hannen. It foel my op hoe swier it wie. Deeglik makke,
sille wy mar sizze. Yn de tiid dat it brûkt waard, siet ik stikem yn de kantine
nei it hockey te sjen. Ik hie as jonkje fan in jier as 14, 15 gjin jild om alle
kearen in kaartsje te beteljen. Guon fan jim sille doe ek al yn de hal sitten
ha. It stie blau fan de reek, dat wit ik noch goed, mar it measte is it lawaai
my bybleaun. As de Flyers in goal makken wie it in orkaan fan leven, dat de
ruten fan de kantine trilje liet.
As we der no meielkoar foar soargje dat dy hal wer oan de
kop ta fol komt, soe dat it team fansels stipe jaan. It seizoen is los, de
doelen binne steld en it is in prachtich spultsje, dus net stinne, mar
hinne!
Reacties
Een reactie posten