SC Heerenveen, het echte verhaal

 

De timmerman

Der is al in soad skreaun en praten oer de situaasje by Sportklup Hearrenfean. Foar de goede oarder, ik bin in supporter, al soenen guon dat oan de ein fan dit artikel wolris oars útlizze kinne. Wêr’t it my om giet is dat ik ‘myn’ eigen klup Hearrenfean net werom kin. Stomme graach wol ik wer it gefoel krije dat ik yn in waarm bad stap as ik it Abe Lenstra Stadion yn rin.

Dat gefoel dat ik jierren hân ha, de lichte foarm fan spanning, want hast altyd barde der wol wat. Wedstriden om tsien oere jûns, stiif útferkocht. Jo woenen der by wêze, yn de 25 jier dat ik in seizoenskaart ha binne de kearen dat ik net oanwêzich wie by in thúswedstriid op de fingers fan ien hân te tellen.

Sûnt earefoarsitter Riemer van der Velde de foarsittershammer demonstratyf oerjoech oan Koos Formsma, feroare de klup.

Ik sil hjir net in blomlêzing oer Van der Velde hâlde, dy syn fertsjinsten foar de SC lykje my helder. In hast fallite boel troch goede kontakten en miskien wat boereferstân út in âld stadion nei in prachtich sfearfol nij ûnderkommen de Champions League yn helpe, ik jou it jim te dwaan.

Dat koe er net allinnich. Jild moast der komme, en net te min. Troch type Sint Bernard bullebak Van der Velde syn sjarme, groeide de OSSH út ta in foarbyld foar alle BVO’s yn it lân. Dat kaam omdat elts it gefoel hie dat ik sketste. Jo woenen der by hearre.

Sa’n klup yn in post-Van der Velde tiidrek moat in direksje ha. Om dêr de goede minsken yn te krijen falt net ta. Boppedat hong it skaad fan de eksfoarsitter oer it stadion. Folslein begryplik, mar jo moatte dêr wol oer kinne. Immen dy’t altyd yn de spotlights stiet, tegearre mei syn frou de klup útdroech as in gesellige kommune dêr’t alles syn gonkje gie, as koste it harren gjin muoite.

De iene nei de oare topspiler kaam nei It Feen en ferdwûn foar in soad jild nei gruttere klups. Reklame hoegde der net makke te wurden, dat regelen de fuotballers sels wol, better kinne jo it net krije.

Soksoarte minsken roppe wjersin op ûnder folk dat krekt wat minder heech op de aperots tahâlde moat. As it bygelyks om oandacht giet. En sa lang ’t it goed giet, hâldt in topaap syn soartgenoaten der wol ûnder. It is mar byldspraak, ik wol Riemer perfoarst net mei in aap fergelykje.

Dy situaasje feroaret as de topaap dea giet, ferslein wurdt troch in oare aap of ferhûzet nei in noch hegere aperots. Dan krije de oaren, dy’t altyd yn it skaad libbe ha, de kâns harren te oppenearjen. En meastal komt dêr yn de tiid flak neidat de topaap him ôfjûn hat, net folle goeds fan. Syn neilittenskip galmet jierren nei, syn eks wyfkes jouwe oan dat hy folle better mei harren omgean koe.

Yn it gefal fan SC Hearrenfean komt dat Formsma oer.

 

Efkes in tuskenstikje. In mearke, liket it wol.

Der wie ris in klassyk ferhaal oer in timmerman. Hy hie skoalle net ôfmakke, wie sa earm as in lús, mar begûn mei in oannimmersbedriuwke. Hy krige de wyn mei, ferkocht de saak en naam doe de keaper oer, boude troch. In suksesferhaal fan begjin oant ein.

De Ried fan Kommissarissen moat neidat Formsma op in ferfelende, net des Heerenveense wize fuort stjoerd is (want sa wie dat!) mei wat oars komme. Leafst immen dy’t al lang yn de klup sit. Yme Kuiper wurdt de nije Riemer. Henk Hoekstra is ek direksjelid en Van der Velde komt yn de RfK. De sfear yn de klup en de oantallen sponsers lije der amper ûnder.

De timmerman boude mar troch. Grutter en grutter waarden de projekten. Ien fan de toppers wie de bou fan in nij fuotbalstadion yn It Hearrenfean. It bedriuw groeide oant 630 miljoen omset yn it jier. De selfmade timmerman bedarre yn de Quote 500.

Nuver dat nimmen eins fan de man hearde. Guon selfmade mannen dy’t bygelyks in horeka gruthannel hienen, waarden publike figueren. Altyd yn it nijs en op TV en radio. De timmerman net. Hy ferkeas de stilte fan efter de skermen wurkje.

En opnij giet it mis. De direksje krijt de eksploitaasje net op oarder, jout mear út as dat der binnen komt yn in besykjen oan te heakjen by de tradisjonele top trije fan Nederlân.

Yn in sjenante parsekonferinsje seit ‘úteinlik’ Bart van der Meer, foarsitter fan de RfK, de mannen de wacht oan. Henk Hoekstra bedarret by de romrofte iishockey klup de Flyers yn Thialf. Yme Kuiper hearre we neat wer fan. Foar it earst komt SC Hearrenfean minder fleurich yn it nijs troch de bylden fan in stel sleine mannen (Kuiper en Hoekstra) dy’t as in stel kweajonges efteryn in sealtsje it mannewaar opsein krije troch in eks Rabobank direkteur dy’t net as soepel en populêr te boek stiet, mannich reorganisaasje útfierde en as in snoeihurde manager net útblonk yn in op in minslike wize omgean mei minsken.

Bedragen dy’t sirkulearje oangeande swijjild dat Hoekstra en Kuiper meikrije om neat te sizzen lit ik hjir mar yn it midden. Mear en mear wurdt Van der Velde ‘lestich’ fûn troch de oare leden fan de RfK, úteinlik wrotte se him der út.

Der stie ris in monumintale buorkerij oan de Tjeerd Roslaan yn Oranjewâld. It wie in gemeentlik monumint. In kostlik plak, efter hûs de bosk. Rêstich wenjen. Der hat jierren in dokter yn hûsmanne. Ek in ferneamde iishockeyman hat der in skoft wenne, mar úteinlik kocht in oar it.     

Wa? De timmerman.

Dy hie syn each op dit unike stee falle litten. It hûs koe him net it measte ynteressearje, it gie om it plak.

Doe die bliken dat de timmerman oan toutsjes lûke koe dêr’t oare minsken net by kinne. Se hingje krekt te heech, jo kinne springe wat je wolle, jo komme der net by. De timmerman wol. Hy pakte in pear fan dy toutsjes beet, luts der oan en in skoft letter die bliken dat de monumintale pleats plak makke hie foar in nijerwetsk kastiel. De measte minsken dy’t der del fytsten seagen der mei ferbjustering nei, mar hast nimmen wist wa’t der wenne. De timmerman liet dat sa. Hy hie syn eigen aginda, en dêr wykte er net fan ôf. Mar yn it nijs?Nimmen hearde of seach de timmerman.  

De ried fan kommissarissen wol net wer in bok sjitte. Der moat reorganisearre wurde, want de direksje dy’t se fuortstjoerd ha, libbe op grutte foet. Sa wurdt it nei bûten brocht. Miljoenen ferdwûnen yn it ôffalputsje. De strategy wurdt sekuer útstippele. In plan komt op tafel dat ‘In nije dei’ as wurktitel krijt. Foar in bûtensteander (‘dêr’t it kâld is’) soe dizze namme oerkomme kinne as in snútslach.

Bart van der Meer, syn netwurk en ek de timmerman sizze der harren sechje oer.

Wat..? De timmerman..?

Rûnom it Abe Lenstra Stadion is Sportstad Heerenveen út de grûn stampt. It Friese Haagje wol him as it sportplak fan it Noarden op de kaart sette. It prima imago fan de SC, Thialf en de Feenstra Flyers, it mei soarch opsetten netwurk fan gastgesinnen en wat net mear. Hearrenfean hat it.

De timmerman heart dat der yn Oranjewâld klachten binne oer it leven dat de sneldyk tusken It Feen en Wolvegea. makket. Der is sels in stichting foar oprjochte.

Rykswettersteat ûndersiket de saak en komt ta de konklúzje dat der yndie aardich lawaai makke wurdt, mar dat der gjin wettelike basis is om maatregels te nimmen. As de timmerman in kear bûtendoar sit en de westewyn it lûd fan de auto’s nei syn kastiel jaget, fielt er him samar ferbûn mei de stichting.

Op syn folslein eigen wize lûkt er wer in kear oan wat toutsjes. Dat giet him al mar handiger ôf, en hy berikt der in soad mei. Net dat de gewoane minsken dat witte, alles bart efter de skermen, sa as er dat wend is.

Rykswettersteat komt mei in oplossing dy’t net daliks foar de hân leit. Der komt in folsleine lûdswâl fan 7 meter heech en 600 meter lang, krekt sa as de stichting it graach wol. Licht fersmoarge grûn, mar gjin beheining om der in wâl fan te meitsjen. Dit alles op grûn fan Steatsboskbehear. Ek de gemeente Hearrenfean sit by de petearen. Trije logge organen om ien tafel: Rykswettersteat, Steatsboskbehear, de gemeente Hearrenfean en... de timmerman.   

It aldermoaiste oan it ferhaal is, dat it hiele projekt fergees útfierd wurde sil. Miljoenen wurde besparre. In net neier te neamen oannimmer wol it wurk wol dwaan. 

As alles regele is, ferdwynt de timmerman gau fan it toaniel. Hy gnysket. Ea sil er it wikseljild miskien brûke moatte, miskien ek net. Mar dat it der is, is wis...

De RFK beslút yn al harren wiisheid dat se Robert Veenstra as nij boechbyld oanstelle. In man dy’t net fiis fan in grou traktemint is en dêr yn Ljouwert al ris op in net sa fraaie wize mei yn it nijs kaam troch syn deklaraasjes en salaris by in skoalle.

Makket de RfK in fout? Se hienen no dochs wol witte moatten dat se in selfmade man oanstelle moatte. Net immen dêr’t it personeel fan op de banken dûnse doe’t er fuort gie. Veenstra freget Van der Velde oft er as adviseur en scout oan de klup ferbûn bliuwe wol. In fraach mei gefolgen.   

Mar der is wat oars geande.

Robert Veenstra is net in ‘leuke’ man. Hy is fan it soarte Bart van der Meer, de RfK makket dizze kar omdat de organisaasje op de kop moat. Talleaze minsken ferdwine. Klupminsken wurde der út skopt. Op TV, radio en yn kranten dogge se harren beklach, mar nimmen leit Robert Veenstra in striebreed yn de wei. Sterker, hy mei freonen om him hinne sammelje. En dêr wachtet er net mei.

Robert Veenstra fiert in skrikbewâld binnen de doarren fan de SC.

Yn de National Hockey League soenen se it in ‘Enforcer’ neame. Googelje dat mar ris.

Is dizze drakoanyske maatregel wol as net nedich? Dêr kom ik net oan, sis it mar. Ik ha it inkel oer myn gefoel by de klup dêr’t ik 25 jier fanatyk supporter fan bin. En as je alle bedragen fan de seizoenskaarten optelle bin ik ek in lytse sponsor. 

Van der Velde lit him as adviseur (en scout) geregeld hearre, en dat falt net goed. Old school tsjin nije biezems. Veenstra hat troch him te freegjen oan te bliuwen, de kunde en ekspertize fan in selfmade man binnen de doar holden. Ien dy’t de klup grut makke hat en dy’t sjocht dat it no oars giet. Oars managed wurdt, om it yn RfK taal te sizzen. Immen dy’t sjocht dat sponsers fuort rinne. Gjin wûnder dat er him oppenearret. 

De smoarge wask, dy’t yn de tiid fan Riemer van der Velde altyd binnendoar bleau, leit binnen de koartst mooglike tiid metersdik op de dyk.

Krêften binnen de organisaasje lykje no foar iens en altyd regaad hâlde te wollen mei de flok fan de earefoarsitter. Alles wurdt út de kast helle om de man mei de grûn lyk te meitsjen. Rjochtsaken wurde oankundige om ferfolgens wer ôfsein te wurden. Net goed skreaune stikken fan djoer betelle ‘klup histoarisy’ yn krantsjes en op de side fan de SC komme net profesjoneel oer. De algemiene opiny oer it yn it iepenbier nei bûten bringen fan de klup troch Veenstra is tige negatyf.

Ofspraken mei de media komt er net nei, allinnich trochdat syn freon by de Ljouwerter krante wurket, wurdt er net mei de grûn lyk makke, krityske stikken ferskine yn de Volkskrant, net yn de LC. Hy is sels net te beroerd om by de Omrop op besite te gean om de ynterim haadredakteur oan te trunen guon twitterjende meiwurkers op it matsje te roppen. Netwurk, hjit soks. As de klup in kear as wat wûn hat, krijt er fia twitter de lokwinsken fan KfdK John Jorritsma, ‘Eindelijk de wind weer in de zeilen...’ De KfdK, immen dy’t him fier fan soks heart te hâlden.

Mar der is mear. Of eins minder. Jild. Teminsten, as it op Sportstad oankomt.

Sportstad Heerenveen is technysk fallyt. Dêr skrikke jim miskien fan, mar sels Epke syn goud kin dat net feroarje.

Hoe kin it dan dat de boel noch iepen is? Dat komt omdat it yn de lucht holden wurdt troch de tige hege hier dy’t Sportklup Hearrenfean foar it Abe Lenstra Stadion betellet. As je it fergelykje mei de hier dy’t opbrocht wurde moat troch bygelyks PSV, spylje dy hast fergees yn it Philips stadion.

De trijehoek Sportstad, SC Hearrenfean en de gemeente Hearrenfean spylje heech spul. Kwa finânsjes stiet it der striemin foar. Mar SC Hearrenfean mei net fallyt gean. Dan bedarret alles yn in delgeande spiraal en is de gemeente de sigaar, as se dat no al net foar in part binne. Correct me if I’m wrong. Eins is it ek net in trijehoek, mar in fjouwerkant...

Op de eftergrûn boetsearret de timmerman rêstich troch. De OSSH, dêr’t it heale bestjoer fan opstapt is, wurdt wer op sterkte brocht. Ien fan de nije bestjoersleden is net alhiel tafallich in soan fan de timmerman. Sa hâldt er oeral in finger yn de brij. Mar sels? Hy is der, mar ek net... Wol krijt er alles ûnder eagen dat mei jild te krijen hat. Dêr hat er dan wol net foar trochleard, mar ferstân hat er der wol fan.

It wurkplan ‘In nije dei’ moat troch Veenstra útfierd wurde. Oer dy syn wurkwize is de timmerman goed te sprekken. Sels seit er oer himsels yn ien fan de twa(!!!) petearen dy’t er ea jûn hat oer himsels dat er:

"Iemand die mensen weet te binden en te mobiliseren om iets gedaan te krijgen. Een mensenmanager. Zo nodig ook spiekerhard, maar wel op een goede manier." Hij noemt zich een netwerker, met een uitstekende neus voor handel en voor ‘daar gaat wat gebeuren’: "Mijn eetonkosten zijn het hoogst van iedereen, maar niemand die er over zeurt. Men denkt meteen dat ik wel weer een lumineuze vent heb ontmoet of een opdrachtgever. Maar het begint niet met netwerken, het begint met goed werk afleveren. Daar praten mensen over, dan moet het klikken tussen personen en zo ontstaan netwerken. In moeilijke gevallen kan klikken het verschil opleveren dat een zaak net wel of net niet lukt."    

Yn dit profyl funksjonearret Veenstra as in model op de catwalk. Tsjin alle logika yn: It oanfallen fan in klupikoan, it striemin oerkomme yn de parse, lânlik tige negatyf it nijs helje yn in toanoanjaand fuotbalprogramma, falsk tusken supporters stean gean en himsels dêr op de foto sette litte. It kin hast net sa wêze dat er dêr gjin skea troch oprint.

Hy is yn alles net, wat Riemer wol wie, in minskeminsk. Mar it programma ‘In nije dei’ útfiere docht er de RfK nei it sin.

Trouwens, neffens myn boarnen is de RfK net unanym yn de stipe oan de foarsitter. In stimferhâlding fan 3-2 oer bepaalde saken dogge de rûnte. Sille fansels daliks as ûnsin fan tafel fage wurde. Yn krisistiid is in fikse ôfkeapsom ek min út te lizzen, jo kinne der fan út gean dat Veenstra as nijmoadrich manager net mei lege hannen nei hûs giet mocht er dien krije.  

En toen? Ja, der is fansels mar ien ding dat wichtich is yn de opportune wrâld fan hjoed-de-dei. En dat is wedstriden winne. Dan krije jo de measten wol wer mei. In trener as Marco van Basten kin dêr ek in begjin fan wêze.

Mar it aller belangrykste, it gefoel werom yn in klup bringe. Hoe dogge je dat? Troch neidat dizze hurde maatregels dien binne wer klupminsken oan te lûken dy’t ferstân fan it spultsje ha en ek noch witte hoe’t jo je fiele wolle as je it Abe Lenstra Stadion yn komme? De tiid fan de earefoarsitter komt net werom. Dat is wol hast wis. It mei drek smiten moat nedich dien wêze. Net allinnich de klup, mar in soad saken dêr omhinne freegje om in feriening mei de útstrieling dy’t de SC hie ûnder lieding fan de selfmade man Riemer van de Velde, sorry dat ik it sis, mar sa sit it al. Immen dy’t minsken bine kin ynstee fan se de gerdinen yn te jeien.

Soe, as ien fan syn lêste keunstjes, de iennige echte baas fan SC Hearrenfean der stikem al mei dwaande wêze hoe’t er dat klearspylje moat? No, timmerman? Hoe sit dat?