Bruce Springsteen syn heidefjild
Bruce
Springsteen syn heidefjild
Wat bloeit de heide oeral prachtich dit jier, sa lês ik yn
de kranten. Moaie foto’s fan pears kleure fjilden der by. It komt omdat we dit
jier wer in normale simmer ha mei in soad Hollânsk reinwetter. Heide, foar ús
as lytse bern wie it symboal fan earmoede. Nea yn de hiele wrâld hie ik tocht
dat op in stik lân dêr’t heit en mem de kij weidzje lieten, ea heide bloeie
soe.
Mar tiden hawwe tiden. As je no de Marijkemuoiwei yn
Oranjewâld delkomme, bloeit der heide. Pears. Der rinne wat skiep om de bjirken
en oare opsjitters koart te hâlden. Op dat fjild lizze myn jeugdjierren. Blomryk
lân mei Frysk reabûnt fee. Myn broer sei dizze wike dat de Van Limburg Stirums,
dy’t yn de kelder op it hôf yn Brongergea bysetten binne, grif ek net tocht hienen
dat der wer heide bloeie soe op de grûn dy’t sy ûntginne lieten.
Dize wike wie ik te rinnen. Ik ha net safolle mei Bruce
Springsteen, mar it tafal (tafal bestiet net) woe, dat ik krekt it komboerd fan
Brongergea passearre en it sicht op Pauwenburg krige, doe’t der in nûmer fan
Springsteen yn myn earen klonk. Pauwenburg, de pleats dêr’t ik 52 jier lyn op
de wrâld kaam. Der stiet no in grutte wenbuorkerij, dy’t Leo Nieuwe Weme der
delsetten hat doe’t er syn winkelformule ferkocht hie.
Ik harke nei muzyk op de Arrow Classic Rock app en Bruce begûn My
Hometown te sjongen. De muzyk fan de E-Street Band is meast wat simpel (Born in
the USA is echt freeslik dom en bombastysk), mar yn dit nûmer hearre je se
amper en dat is prima. De teksten fan Springsteen binne nammentlik wol moai. Ik
sweefde werom nei myn jonge jierren, mei in McCormick ynstee fan de Buick dêr’t
it yn My Hometown oer giet. Mar it gefoel is krekt itselde.
Brongergea. Safolle feroare, fan in streek fol boerebedriuwen
nei in strjitte dêr’t se harren drok meitsje oer deimen. Inkel de hynders binne
bleaun. Mar kij rinne al jierren net mear yn Oranjewâld. De lêste boer mei kij wie op buorkerij Donglust, dêr wurdt as we speak ek in kolossale wenbuorkerij
fan makke.
Oranjewâld, it sâlt fan de Fryske wrâld, is ferwurden ta
in park. Moai om troch te rinnen, mar ik mis it doarp fan de jierren 70. Kafee
Oord, Hakse die Bakse, safolle is ferlern gien. De keallekeuring op de jister,
hast op itselde plak stie no de tinte fan it Oranjewoud festival. Wy hienen
bomfolle sealen mei de iisklupjûnen yn Tropenfauna, gjin ferlet fan in
festival.
‘Last night I set him up, behind the wheel, said son take
a good look around, this is your hometown,’ song Bruce yn myn ear.
De heide bloeit miskien moai, mar soms wie eartiids alles
dochs better, Bruce.
Reacties
Een reactie posten