It nûmer datst belje kinst
Simpel. Simpel en ienfâldich. Sa moat it. Dan in goed
glês, en sliepe sûnder dreamen. Dat is myn libben, net mear en net minder.
Wa’t ik bin? Dat bin ik sels al jierren ferjitten, of ik
ha it ferkrongen, dêr wol ik ôfwêze. Mar dat sliepen, dat is essinsjeel. As ik
dat net mear kinne soe, wie it net bêst, ik ha myn beauty sleep mear as nedich.
It hâldt my skerp, it soarget derfoar dat ik rasjoneel tinken bliuwe kin, de
gedachten by it wurk dat foar my leit. Gjin ôflieding, gjin ynminging troch
nachtmerjes, sliepe om it libben dat ik libje yn stân te hâlden. Miskien tsjin
better witten yn, mar ik bin ûnstjerlik, nimmen wit wa’t ik bin, sels iksels
net, dus wat wolle je noch mear. Wa sil my wat meitsje. Wa bin ik? Ik bin in
karikatuer fan wat ik tocht dat ik wurde soe. In komplete ramp, alles ynjûn
troch omstannichheden dy’t ik nea foarsjoen hie, sels net iens betinke kinnen
hie. Ik bin, sa as se sizze, it nûmer datst belje kinst. Ik ha gjin namme, ik
bestean net foar de wrâld. Mar dat is in leagen, want ik bin der wol, ferdomd
ast net wier is.
Miskien hie it better west as ik der net mear wie, in
ûnderwerp wêrfan’t ik my wolris ôffrege ha oft it de muoite wie om oer nei te
tinken. Mar net te lang, want dat soe my ôfliede kinne fan wat der foar my leit.
Miskien hie ik opnaam wurde moatten yn in earder stadium, mar as eat net bard
is, kinne je der gjin oardiel oer jaan, dus ha ik dat neist my dellein.
Wat oerbliuwt?
Ik.
Reacties
Een reactie posten