Imagoskea: Robert Veenstra exit

In jier as tsien lyn. 

Stel jo ha in bedriuw dat goed rint. Jo wolle fan it regionale stimpel ôf. En dus tinke jo nei oer sponsoring, om de namme fan jo bedriuw by in grutter publyk bekend te meitsjen. Fuotbal liket jo wol wat, it is de nasjonale sport.
Dan tinke jo nei oer hokker klup jo it jild yn stekke wolle. Ajax? Nee, dan kinne jo de regio Rotterdam as plak om saken te dwaan wol ferjitte. Feyenoord? Nee, dan is de haadstêd in no go zone. PSV? Nee, dan is de folsleine rânestêd tsjin jo.

Jo tinke noch mear nei. Wat is dan it plak? Ja, fansels, SC Hearrenfean! De klup dy't in goed imago hat, dêr't nea gedonder is, in klup dy't troch in bullebak dy't Riemer van der Velde hjit op krekt de goede wize nei bûten ta útdroegen wurdt.
Jo meitsje in ôfspraak en wurde troch de foarsitter by de doar weihelle. Jo fiele jo daliks thús yn de grutte OSSH, omdat de foarsitter jo persoanlik yntrodusearret.

Jo bedriuw wurdt lânlik bekend, en der is nimmen dy't der in ferkeard wurd oer seit dat jo sponsor fan de SC Hearrenfean binne. In sympatike klup.

Hjoed.

Jo ha in bedriuw dat nettsjinsteande de krisis noch goed rint. Jo wolle mear, grutter. En dus tinke jo nei oer sponsoring yn it fuotbal, dat noch altyd folkssport nûmer ien is.
Jo oriïntearje jo en komme út by FC Twente.
Eins hienen jo wol sponsor fan SC Hearrenfean wurde wollen, mar yn de lêste jierren is it soarchfâldich opboude imago fan dy ea sa sympatike klup slim fertutearze en it soe earder spytgnyskende kommentaren opleverje as dat it jo nije klanten opsmite soe, mochten jo it jild nei It Feen bringe.

Imagoskea is yn 'e regel net te genêzen, it wrot yn jo organisaasje oant dy boem seit. En wa as no wat ferkeard dien hat? Dat docht der eins net ta. It kwea is al dien.

Robert Veenstra syn tiid by SC Hearrenfean is oer. Imagoskea docht him de das om.